Андижон вилоятида ҳуқуқ-тартибот идорасининг беш нафар ходими битта жанжалчига кишан солишга ҳаракат қилишган. Эркак навбатсиз ёқилғи қуйиш шохобчасига кирмоқчи бўлган, бу эса бошқа ҳайдовчиларнинг норозилигига сабаб бўлган. Бу ҳақда вилоят ИИББ хабар бермоқда.
Кеча ижтимоий тармоқларда ҳуқуқ-тартибот идорасининг беш нафар ходими қаршилик кўрсатаётган одамга кишан солишга уринаётганини акс этган видео тарқалди. Кейинчалик маълум бўлишича, эркакда "навбатда туриш маданияти" тушунчасининг йўқлиги ҳодисани келтириб чиқарган.
Андижон вилояти Пахтаобод туманидаги ўзига ўта ишонган фуқаро машинасини навбатсиз ёқилғи билан тўлдиришга қарор қилган. Бу бошқа кутаётган ҳайдовчилар орасида норозиликни келтириб чиқарган.
Можароли вазиятни ҳал қилиш учун ҳуқуқни муҳофаза қилиш идоралари ходимлари аралашган. Бу вақтда улар ушбу ёқилғи қуйиш шохобчаси ҳудудида жамоат тартибини кузатиб туришган.
Ҳуқуқ-тартибот идоралари ходимлари аввал навбатсиз кирмоқчи бўлган фуқарога жамоат тартиби қоидаларига риоя қилиш кераклигини тушунтиришга ҳаракат қилишган. Аммо уларнинг сўзлари ҳеч қандай таъсир кўрсатмагач, фуқаро қаршилик кўрсатишни бошлаган.
Бошқа иложини кўрмаган ҳуқуқ-тартибот идоралари ходимлари ҳеч қандай тан жароҳати етказмасдан уни тинчлантириш учун куч ишлатишган.
Фуқарога нисбатан Маъмурий жавобгарлик тўғрисидаги Кодекснинг 183-моддаси (майда безорилик) ва 194-моддаси 1-қисми (ички ишлар органлари ходимининг қонуний талабларини бажармаслик) бўйича маъмурий баённома тузилган. Ҳозирги вақтда ушбу иш бўйича ҳолатлар суд томонидан кўриб чиқилмоқда.
