Тошкент вилояти Қибрай тумани аҳолиси ижтимоий тармоқларда чидаб бўлмас ҳиддан шикоят қилмоқда. Ҳид туфайли ҳатто деразаларни очиш имконсиз бўлиб қолмоқда. Маҳаллий аҳолининг сўзларига кўра, ҳиднинг манбаи иссиқхоналарда товуқ гўнги ва кўмирни ёқишдир, буни фойдаланувчиларнинг кўплаб видеолари ҳам тасдиқлайди.

"Мен Қибрайда, “Обод” маҳалласида яшайман ва ҳозирда бу ҳиддан дераза очиб бўлмайди. Маҳалла гуруҳида бўлганимда, хабар юборганимдан сўнг, видеони суратга олган бир йигит ва мени   гуруҳдан чиқариб ташлашди", — дея шикоят қилмоқда маҳаллий аҳолидан бири.

Гувоҳларнинг видеолари шуни кўрсатадики, иссиқхоналар иситиш учун кўмирдан, шунингдек, товуқ гўнгидан фойдаланади. Маҳаллий аҳоли бундай усуллар атроф-муҳитга ва иссиқхоналар яқинида яшовчи одамларнинг соғлиғига жиддий зарар етказишидан хавотирда.

Одамлар маҳаллий ҳокимият ва табиатни муҳофаза қилиш хизматларини муаммога эътибор беришга ва атроф-муҳитга зарарли материаллардан фойдаланишни тўхтатиш чораларини кўришга чақирмоқда.

Эслатиб ўтамизки, маҳаллалар уюшмасининг Тошкент шаҳар бошқармаси бошлиғи Фурқат Маҳмудхўжаев Тошкентнинг Юнусобод туманига, бетонка ёнидаги иссиқхоналар атрофига борган. У ерда ҳаво жуда ифлосланган   бўлиб, бошқарма бошлиғи шаҳар ҳокимиятини ушбу зарарли ҳодисага қарши курашни кучайтиришга чақирган.

Бундан ташқари, Экопапартия Тошкент атрофида 631 та иссиқхона фаолият юритаётганини, уларнинг 60 фоизи кўмир, резина шиналар ва бошқа ёнувчи материаллардан фойдаланаётганини маълум қилган.