Бугунги кунда дунёда кузатилаётган коронавирус пандемияси сабабли кўпгина давлатлар аҳолини рўйхатга олишни ўтказиш муддатларини кейинги йилларга кўчириш чораларини кўришмоқда. Жумладан, 2020 йилда Россия Федерацияси, Қозоғистон ва Aрманистон Республикаларида ўтказилиши режалаштирилган аҳолини рўйхатга олиш тадбирлари 2021 йилга кўчирилди.
Маълумки, Ўзбекистон Республикаси Президентининг 2019 йил 5 февралдаги ПФ-5655-сонли Фармонига мувофиқ, Ўзбекистон Республикасида аҳолини рўйхатга олиш 2022 йилда ўтказилиши белгиланган эди. Aҳолини рўйхатга олиш тадбири кенг кўламли, кўп вақт ва катта маблағ талаб этадиган тадбир бўлиб, уни ўтказиш учун 2-3 йил давомида тайёргарлик ишларини олиб бориш талаб етилади.
Мамлакатимизда мустақиллик йилларида аҳолини рўйхатга олиш тадбири илк бор ўтказилаётганлигини инобатга олиб, тадбирга пухта тайёргарлик кўриш ва уни сифатли ўтказиш мақсадида, Ўзбекистон Республикаси Вазирлар Маҳкамасининг 2020 йил 11 ноябрдаги “Ўзбекистон Республикасида 2023 йилда аҳолини рўйхатга олишга тайёргарлик кўриш ва уни ўтказиш чора-тадбирлари тўғрисида”ги 710-сон қарори билан республикамизда аҳолини рўйхатга олиш тадбири 2023 йилда ўтказилиши белгиланди.
Ушбу қарорнинг 6-бандида Қорақалпоғистон Республикаси Вазирлар Кенгаши, вилоятлар ва Тошкент шаҳар, туман ва шаҳарлар ҳокимликлари, Ўзбекистон Республикаси Давлат солиқ қўмитаси ҳузуридаги Кадастр агентлиги, унинг жойлардаги бўлимлари, Маҳалла ва оилани қўллаб-қувватлаш вазирлиги 2021 йил 1 апрелга қадар аҳоли пунктлари ва кўчалар ном белгиларини ўрнатиш, хонадон ва уйларни тўлиқ рақамлаш ишларини якунига етказиш ва 2023 йилда аҳолини рўйхатга олиш даврига қадар мунтазам равишда янгилаб борилишини таъминлаш вазифаси юклатилган.
Маҳалла идоралари томонидан аҳоли пунктларида яшовчи фуқаролар рўйхатлари янгиланиб тақдим этиб борилмоқда. Бундан ташқари, рўйхатга олиш тадбирини аҳоли ўртасида кенг тарғиб қилиш мақсадида телевидение, радио орқали кўрсатув ва эшиттиришларда, аҳоли гавжум бўладиган жойлар (бозорлар, супермаркетлар ва х.к.) да ўрнатилган катта экранли монитор ва радиузелларда эълонлар бериб борилмоқда. ОАВ лар, жумладан, газета ва журналлар, ижтимоий тармоқларда, расмий веб-сайтларда мақолалар билан чиқишлар қилинмоқда. Олий ва ўрта-махсус таълими муассасаларида, умумтаълим мактабларида, маҳалла идораларида ҳамда бошқа ташкилот ва муассасаларда учрашув ва семинарлар ташкил этилиб, рўйхатга олиш тадбири юзасидан кенг тушунтириш ишлари амалга ошириб келинмоқда.
Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари хузуридаги Ўзбекистон Республикасида 2023 йилда аҳолини рўйхатга олишни ўтказишга кўмаклашиш бўйича ҳудудий комиссиялар 2021 йилда (синов тариқасида) ва 2023 йилда аҳолини рўйхатга олишга тайёргарлик кўриш ва уни ўтказиш билан боғлиқ чора-тадбирларни белгиланган муддатларда ва сифатли амалга оширилишида, қолаверса янги Ўзбекистонни қуришда аҳолини рўйхатга олишда иштирок этувчи давлат органлари ўзига юклатилган вазифаларни сидқидилдан бажарса, аҳоли тўғрисида аниқ ва сифатли маълумот олиш, мамлакатни келгусида комплекс ривожлантириш, жумладан, республика ва ҳудудларни ижтимоий-иқтисодий ривожлантириш, янги иш ўринлари яратиш, аёллар ва болалар саломатлигини яхшилаш ва оилаларга ёрдам кўрсатиш бўйича дастурларни манзилли ишлаб чиқиш имкониятини беради.
