Самарқанд вилоятида 10 ёшли қизга, яъни ўзининг жиянига бузуқлик қилиб келган 45 ёшли эркакка нисбатан суд ҳукми ўқилган. Бу ҳақда зўравонликка қарши “Немолчи” лойиҳаси хабар бермоқда.

Эркак деярли бир ярим йил давомида (2022 йил февралдан 2023 йил июнгача) қизалоққа қарши куч ва таҳдидлар қўллаган, унга жинсий аъзоларини кўрсатган, ечинтирган ва жинсий алоқага ундаган.

Дастлаб, иш Жиноят кодексининг 129-моддаси 3-қисми (зўравонлик ва таҳдидлар билан 14 ёшга тўлмаган шахсга нисбатан бузуқ ҳаракатларни содир этиш) бўйича қўзғатилган, аммо кейин иш қайта малакаланиб, эркак 119-модданинг 4-қисми (14 ёшгача бўлган шахсга нисбатан ғайритабиий шаклда жинсий эҳтиёжни қондириш) бўйича айбланган. 

28 сентябрь куни ушбу иш бўйича суд жараёни якунланган, эркак айбдор деб топилган ва 16 йилга озодликдан маҳрум этилган.