Яқинда Ўзбекистонда болалар ўртасида ичак гельминтиозининг олдини олиш бўйича навбатдаги кампания бошланади. Хусусан, октябрь-ноябрь ойларида 2-10 ёшли болаларни дегельминтизация қилишнинг навбатдаги турини ўтказиш режалаштирилган. Бу ҳақда Санитария-эпидемиологик осойишталик ва жамоат саломатлиги қўмитаси хабар бермоқда.
Ушбу даволанишдан олдин республиканинг барча ҳудудларида 2023-йил сентябр ойида болалар боғчаларида ва мактабларнинг бошланғич синфларида ичак гельминтозлари бўйича болалар ўртасида саралаш лаборатория текширувлари ўтказилган. Худди шу каби лаборатория тадқиқотлари дегельминтизация туридан сўнг амалга оширилади. Бу амалга оширилган чора-тадбирлар самарадорлигини баҳолаш учун бажарилади, дегельминтизация қилишдан олдин ва кейин болаларнинг ичак гельминтозларидан зарарлангани ўрганилади.
Ўтган йилларда олиб борилган тадқиқотлар республикада дегельминтизация бўйича оммавий турларнинг юқори самарадорлигини кўрсатди, чунки гельминтлардан зарарланиш 3-4 баравар камайган.
Таъкидлаш керакки, гельминтоз паразит қурт (гижжа)нинг инсон танасига кириб қолиши натижасида юзага келади. Бугунги кунга қадар бундай зараркунандаларнинг 250 га яқин тури аниқланган, улардан 9 тури болаларда кузатилади. Паразит инсон танасида 5 дан 150 мингтагача тухум қўяди. Уларнинг хавфи шундаки, улар тез ривожланиб, ичак орқали организмга тарқалиб, ички органлар ва тизимларга зарар етказади.
Агар болада ошқозон оғриғи, иштаҳа йўқолиши кузатилса, у асабий бўлиб қолса, тушида тишларини ғижирлатса – ушбу паразитлардан бири унинг танасига кириб борганини англатади.
Аввалроқ, пойтахтнинг таниқли педиатрларидан бири Наталья Грачева нима учун Ўзбекистонда гижжага қарши оммавий кампаниялар ўтказилаётгани ҳақида мухбиримизга сўзлаб берган эди.
