Тошкент мактабида юз берган рус тили бўйича можарога Ўзбекистон партияси етакчиси, шунингдек, Россия ТИВ расмий вакили Мария Захарова муносабат билдирган.

Эслатиб ўтамизки, кеча Тошкент шаҳрининг Чилонзор туманидаги 188-мактабида рус тили ўқитувчиси ўрниги кирган директор ўринбосари ўқувчига нисбатан ноўрин хатти-ҳаракатлар қилган эди. Бола ўқитувчидан рус тилида дарс беришни сўраган ва бунинг учун турктки олган, юз ва бошига урилган.

Бу шов-шувли ҳолат биргина мамлакат жамоатчилиги орасида кучли резонансга сабаб бўлиб қолмаган. Воқеага Ўзбекистон ва Россия расмийлари муносабат билдиришган.

Масалан, "Миллий тикланиш" партияси етакчиси Алишер Қодиров ўқитувчиларнинг малака даражаси ва психологик ҳолатини жиддий таҳлил қилиш зарурлигини билдирган. Унинг сўзларига кўра, мактабгача ва мактаб таълими вазирлиги жамоатчиликни турли статистика билан чалғитади, чет эл тажрибасини ҳисобга олишдан бош тортади ва мамлакат келажагига катта зарар етказадиган ўқитувчиларни танламоқда.

Россия ТИВ расмий вакили Мария Захарова ҳам воқеага муносабат билдирган ва вазият болага нисбатан ҳаддан ташқари ташвиш ва ҳамдардликни келтириб чиқармай қолмаслигини айтган. Унинг сўзларига кўра, Россия томони Ўзбекистондан вазиятни расмий тушунтириш ва ҳуқуқий баҳолашни, агар асосли бўлса, болага нисбатан шавқатсиз муносабат қилган шахсга қарши чоралар кўришни сўрамоқда.

“Давлатларнинг стратегик шериклиги ва иттифоқчилиги бўлган дўстона муносабатларида ҳеч қандай адоватга ўрин йўқ ва бўлиши ҳам мумкин эмас, айниқса тил бўйича", - дея таъкидлади у.

Шунингдек, Захарова рус тилидан турли хил мулоқот соҳаларида кўп асрлик фойдаланишнинг, маданий, маърифий, илмий ва ижтимоий-иқтисодий жиҳатдан ўзаро бойитишнинг фойдали таъсирини жамоатчиликка эслатишни ўз ичига олган изчил чоралар кўриш зарурлиги хусусида қўшимча қилган.