Ўзбекистонда тадбиркорлик муҳитини ривожлантириш, тадбиркорларнинг ҳуқуқлари ва қонуний манфаатларини ҳимоя қилиш давлат сиёсатида устувор йўналишлардан бирига айланди. Президент ҳузуридаги Тадбиркорлик субъектларининг ҳуқуқлари ва қонуний манфаатларини ҳимоя қилиш бўйича вакил девони бу соҳада самарали фаолият олиб бормоқда.
Тадбиркорлик ривожидаги ҳуқуқий ҳимоянинг аҳамияти
Тадбиркорлар мамлакат иқтисодиётини ҳаракатга келтирувчи асосий кучлардан бири ҳисобланади. Шу боис, уларнинг манфаатларини ҳимоя қилиш, ҳуқуқий кафолатларини таъминлаш ва маъмурий тўсиқларни бартараф этиш муҳим аҳамият касб этади. Бу борада, бизнес омбудсманнинг фаолияти иқтисодий тараққиётга кўмаклашиб, тадбиркорларнинг ишончини оширишга хизмат қилмоқда.
2024 йил якунлари: рақамлар ва натижалар
Ўтган йил давомида Жиззах вилоятида тадбиркорлардан 600 дан ортиқ мурожаат келиб тушган бўлиб, уларнинг 80 фоизи қаноатлантирилди, қолган 20 фоизига ҳуқуқий тушунтириш берилди.
Бундан ташқари, 1000 дан зиёд тадбиркорнинг ҳуқуқлари тикланди. Масалан:
“Матонат сервис” фермер хўжалиги раҳбари И. Усмановнинг 24,4 млн сўм миқдоридаги ортиқча солиқ тўлови қайтарилди.
“Luks gold stroy” МЧЖ раҳбари Б. Бобоназаровга 14,1 млн сўм ноқонуний ундирилган маблағ қайтарилди.
“School Farali” МЧЖ раҳбари Ш. Алиқулованинг лицензия олиши таъминланди.
Тадбиркорлик муҳитини яхшилаш йўлидаги ислоҳотлар
Тадбиркорларнинг ҳуқуқлари ва манфаатларини ҳимоя қилиш мақсадида бир қатор жиддий чоралар кўрилди:
132 нафар давлат идоралари мансабдор шахсларига нисбатан маъмурий чоралар кўрилди.
89 та ноқонуний қарор ўзгартирилди ёки бекор қилинди.
1 млрд. 30 млн. 190 минг сўмлик ортиқча қарздорлик ҳисобдан чиқарилди.
Шунингдек, "Тадбиркор виртуал офиси" ахборот портали орқали келиб тушган 555 та масаланинг 543 таси (98%) тегишли идоралар томонидан ҳал қилинди. Бу жараёнда тадбиркорларга 7,2 млрд. сўм кредитлар ажратилишига ёрдам берилди.
Тадбиркорликни ҳимоя қилишдаги янги қадамлар
Давлат назорати тизимида шаффофликни ошириш ва тадбиркорларни ноқонуний текширувлардан ҳимоя қилиш мақсадида:
Бизнес омбудсманга "Ягона давлат назорати" ахборот тизими орқали назорат органларининг рейтингини эълон қилиш вазифаси юклатилди.
Назорат органларининг тадбиркорлик фаолиятига аралашуви кескин чекланди.
Текширув ўтказиш ваколатига эга мансабдор шахсларнинг аттестация натижалари кузатиб борилади.
Юртбошимиз томонидан тадбиркорликни қўллаб-қувватлаш, маъмурий ва ҳуқуқий тўсиқларни бартараф этиш бўйича амалга оширилаётган чоралар ўз самарасини бермоқда. Қабул қилинган янги ислоҳотлар бизнес муҳитини янада яхшилаб, тадбиркорларга кенг имкониятлар яратишга хизмат қилади.
Тадбиркорлар учун ҳуқуқий ҳимоянинг кучайтирилиши нафақат уларнинг ишончини оширади, балки мамлакат иқтисодиётининг изчил ривожланишига ҳам катта ҳисса қўшади.
