Ўзбекистонда 2025 йил 1 сентябрдан бошлаб миграция қоидаларини бузгани учун депортация қилинган фуқароларга икки йил мобайнида хорижга чиқиш биометрик паспортини расмийлаштириш тақиқланади. Бу ҳақда Вазирлар Маҳкамасининг тегишли қарорида маълум қилинган.

Қарорга кўра, ушбу чеклов қонуний визаси тугаган, ноқонуний равишда чет элда бўлган ёки бошқа миграция қоидабузарликлари сабабли депортация қилинган шахсларга тааллуқли бўлади.

Аввалроқ, хорижга чиқиш паспортини беришга қўйиладиган чекловлар фақат айрим ҳолларда, хусусан жиноий иш юритилаётган шахслар, маъмурий назоратда бўлганлар, алимент тўламаганлар ёки ёлғон маълумот берганлар учун амал қилар эди. Яъни бу чекловлар эндиликда анча кенгроқ қамровга эга бўлади.

Қайтарилган харажатлар ва молиявий жавобгарлик

Агар фуқаро Ташқи меҳнат миграцияси агентлиги маблағлари ҳисобидан Ўзбекистонга қайтарилган бўлса, у ҳолда келтирилган харажатларни тўлиқ қоплаш мажбурияти юкланади. Шу билан бирга, олдинроқ Миграция жамғармасидан олинган субсидия ва компенсациялар ҳам қайтарилиши лозим бўлади.

Давлат дастурларидан чиқариш ва реестрга киритиш

Қайтиб келган фуқаролар, қайтиб келган санадан бошлаб бир йил давомида хорижда ташкил этилган меҳнат дастурларида иштирок эта олмайди. Айниқса, турмуш даражаси юқори бўлган давлатлардаги ишга жойлашиш имкониятлари чекланади. Шунингдек, меҳнат шартномаларига янги тартибда молиявий жавобгарлик ва кафиллик шартлари киритилади.

Ички ишлар вазирлиги, хориждаги консулликлар ва Миграция агентлиги ҳамкорлигида депортация қилинган фуқаролар бўйича ягона электрон реестр яратилади. Ушбу базага фақат миграция қоидаларини бузганлар эмас, балки ўз хатти-ҳаракатлари билан Ўзбекистоннинг халқаро имижига путур етказган шахслар ҳам киритилиши мумкин.