“Ўзбекнефтгаз” АЖ Бошқаруви раиси Меҳриддин Абдуллаев топшириғи билан Устюрт минтақасидаги конлар ва истиқболи майдонларда баҳолаш-ишлатиш қудуқларини бурғилаш бўйича ишлар жадал суръатларда олиб борилмоқда. Бу ҳақида “Ўзбекнефтгаз” корхонаси ахборот хизмати ёзмоқда.
Ушбу қудуқни бурғилаш ишлари 2022 йилнинг 07 июнь куни ERIELL Oilfield Services Middle East DMCC компанияси томонидан бошланган бўлиб, чуқур ер ости қатламларининг мураккаб тузилиши ва турли геологик қийинчиликларга қарамасдан қудуқ 4308 метр чуқурликкача бурғиланди.
Қудуқда аниқланган истиқболли қатламларни 4000 метрдан ортиқ чуқурликда маҳсулдорликка синаш натижасида қуйи юра даврига тегишли ётқизиқлардан саноат миқёсидаги табиий газ оқимлари олинди ва қудуқ ишга туширилди.Дастлабки маълумотларга кўра, ушбу қудуқдан олинган табиий газ маҳсулотининг кунлик миқдори 1 млн. 100 минг куб метрдан ортиқни ташкил этмоқда.
Ҳозирда қудуқдаги маҳсулдор қатламларнинг босими ва ҳарорати каби бир қатор кон-геологик кўрсаткичларни аниқлаш, шунингдек, коннинг саноат миқёсида ишлаб чиқариш қувватларини баҳолаш бўйича тадқиқот ишлари олиб борилмоқда.
Эътиборли жиҳати, ушбу кон бўйича тавсияларни ишлаб чиқиш ва уларни амалиётга татбиқ этиш, табиий газга истиқболли қатламларни аниқлаш, уларда синаш ва табиий газ қазиб чиқариш ишларини ташкил қилиш бўйича барча тадбирлар “Ўзбекнефтгаз” АЖ мутахассислари ва ходимлари томонидан амалга оширилди.
“Ўзбекнефтгаз” АЖ жамоаси томонидан ишга туширилган янги қудуқдан қазиб олинадиган углеводород хомашёси биринчи навбатда Ўзбекистон Республикаси аҳолиси, шунингдек, иқтисодиётининг энг муҳим тармоқларини барқарор равишда табиий газ билан таъминлаш ҳамда уларнинг ёқилғи-энергетика ресурсларига бўлган талабини қондиришга йўналтирилади, дейилган мазкур хабарда.
