Тошкентда 48 ўрамдаги гиёҳвандлик моддалари ва дорихона наркотикларини тарқатмоқчи бўлган шахс қўлга олинди. Иш эълонини Telegram орқали топганини айтган эркак 10 йилдан 20 йилгача озодликдан маҳрум этилиши мумкин.

Тошкентнинг Сергели туманида 36 ёшли Зафар Ж.нинг КИА К5 русумли автомашинасида июль ойи охирида тарқатиш учун тайёрланган синтетик гиёҳвандлик моддаси топилди, дея хабар қилди пойтахт ИИБ матбуот хизмати 8 август куни.

Оқ кукунсимон наркотик моддаси 48 та ўрамга қадоқланган ҳолатда бўлган. Бундан ташқари, 20 дона «Регапен» таблеткалари ва 6 дона «Зардекс» капсулалари мусодара қилинган.

Гумонланувчи энг яқин ички ишлар бўлимига олиб кетилган. Эркак иш эълонини Telegram орқали топганини маълум қилган.

Мазкур ҳолат юзасидан Сергели тумани ИИО ФМБ ҳузуридаги тергов бўлими томонидан Ўзбекистон Жиноят кодексининг 273-моддаси 5-қисми («Гиёҳвандлик воситалари, уларнинг аналоглари ёки психотроп моддаларни қонунга хилоф равишда тайёрлаш, олиш, сақлаш ва бошқа ҳаракатлар қилиш») билан жиноят иши қўзғатилган.

Гумонланувчига нисбатан қамоқ эҳтиёт чораси қўлланган. Тергов давом этмоқда.

Ушбу модданинг ушбу қисмидаги жазо 10 йилдан 20 йилгача озодликдан маҳрум қилишни кўзда тутади.