Тошкент вилоятида икки ёшли бола кўча ҳожатхонасининг хандағига тушиб кетган. Уни фақат Фавқулодда вазиятлар вазирлиги ходимларининг тезкор етиб келгани туфайли қутқаришнинг имкони бўлган.
Вазирликнинг хабар беришича, 2024 йил 13 май куни соат 16:58 да уй эгасининг эҳтиётсизлиги туфайли бола ҳожатхона хандағига тушиб қолгани ҳақида хабар келган. Бу Тошкент вилояти Зангиота туманидаги "Ҳаракат" маҳалласида содир бўлган.
Қутқарувчилар зудлик билан манзилга етиб боришган ва махсус қутқарув ускуналари ёрдамида болани тахминан 5 метр чуқурликдан олиб чиқиб, унинг ҳаётини сақлаб қолишган.
Эслатиб ўтамиз, аввалроқ Фавқулодда вазиятлар вазирлиги ходимлари чуқур хандаққа тушиб қолган Чинозда яшовчи 15 ёшли қизни қутқаришган эди.
Шуни ҳам таъкидлаш керакки, 2017 ва 2023 йилларда олти киши ҳожатхона хандағига тушган телефонни олишга уриниб вафот этган. Уларнинг ўлимига нажас газлари аралашмасини ўз ичига олган ҳавода кислород етишмаслигидан асфикция сабаб бўлган.
