Бухоро вилоятида ёш эр-хотин янги туғилган қизини сотишга урингани учун жазоланган. Олинган пул эвазига эр-хотин бизнес очишни режалаштиришган.

Суд қарорига кўра, 24 ёшли эркак ва 23 ёшли аёл янги туғилган қизини ўзларига таниш бўлган фарзандсиз кишиларга сотишга қарор қилишган. Улар ўз фарзандларини 7 минг долларга баҳолашган. Бу пулга ёш ота сартарошхона очишни режалаштирган.

Боланинг харидорлари ушбу вазиятнинг ноқонунийлигини англаб, ҳуқуқни муҳофаза қилиш органларига мурожаат қилишган. Эр-хотин олинган пулнинг ҳақиқийлигини текшириш учун банкка боришганида, у ерда ушланган.

Судда эр-хотин айбни тўлиқ тан олишган. Харидорларга жазо берилмаган, суд уларга пулни қайтариб беришни буюрган. Чақалоқ болалар уйига жойлаштирилган.

Қизнинг онаси ва отаси Жиноят кодексининг 135-моддаси (одам савдоси) бўйича мос равишда беш ва беш ярим йиллик қамоқ жазосига ҳукм қилинган.

Эслатиб ўтамизки, Навоий вилоятида бир аёл ўз фарзандини 10 миллион сўмга сотмоқчи бўлган.