Al Jazeera, The Guardian, Eurasianet ва The Diplomat нашрлари учун  мақола ёзиб келаётган польшалик журналист аёл Агнешка  Пикулицканинг Ўзбекистонга киришига тақиқ қўйилган.  Бир  муддат илгари у ТИВнинг “Рустам”  исмли  ходимини тегажоқликда айблаб,  танилган эди.  

Тақиқ қўйилгани ҳақида Агнешканинг ўзи Twitter орқали маълум қилган.  Пикулицканинг Eurasianet нашрига  ҳикоя қилишича,  у Ўзбекистондан  Қозоғистонга  борган.  Чунки, Ўзбекистонда визасиз  30 кун бўлиш мумкин холос. Шу  муддат тугагач, давлат ҳудудини  бир муддат  тарк этиш,  “кирди –чиқди”  амалиётини  бажариш лозим.

Аёл дарҳол  қайтмоқчи бўлган, бироқ ўзбекистонлик чегарачилар  сабабини тушунтирмасдан,  уни киришга  қўйишмаган. Натижада 7 ноябрдан бошлаб,  Пикулицка  икки давлат ўртасида  қолган.  COVID-19 билан боғлиқ чекловлар  туфайли Агнешка  Қозоғистонга ҳам  қайта олмайди.

“Мен ҳалигача  чегарадаман, совқотдим, егулик ва  уйқу учун  маъқул жой йўқ. Мен жиноят содир этмаганман, шунчаки ўз ишимни  бажарганман”, -дея ёзмоқда у Twitterда.

Унинг  сўзларига кўра, Ўзбекистон  ТИВ  аёлни  Тошкент аэропортига олиб бориб,  унга  Туркияга учадиган  самолётдан жой қилиб  бериш, йўл-йўлакай Тошкентдаги хонадондан  шахсий буюмларни  олиб  кетишни таклиф қилишган. Бироқ, бу учун бор-йўғи 10 дақиқа  ажратилишини билиб, Пикулицка рад жавобини берган.

Шунингдек, журналист аёл  ғамхўрлик ва эътибор учун  чегарачиларга  миннатдорчилик  билдирган. 

Эслатиб  ўтамизки, июнь ойида Ўзбекистон ТИВ польшалик журналист аёлга аккредитацияни узайтирмаган эди. Агнешка  қайсидир қонунчиликни бузишда айбланган.  Лекин  айнан  қайси қонунлар бузилганлиги  ошкор қилинмаган.