Жамоат транспорти ва кўчаларда аёлларга тегажонлик қилаётган шахслар ҳақидаги янгиликлар кун сари кўпайиб бормоқда. Шундай дилхира воқеалардан бири куни кеча юз берган. Таниқли пиццерияда етказиб берувчи бўлиб ишлаётган ходим қизга қўнғироқ қилиб, жинсий алоқага қилишга кўндирмоқчи бўлган. Бу ҳақда зўравонликка қарши “Немолчи.уз.” лойиҳаси хабар бермоқда.
“24 июль куни соат 17:26 да мен таниқли пиццериядан пиццага буюртма бердим. Соат 18:30да курьер менга қўнғироқ қилди, лекин қўнғироқни кўрмай қолибман. Унга ўзим қайта чиқдим, састга тушдим ва буюртмамни олдим. Бир неча дақиқадан сўнг у яна қўнғироқ қилди ва исмимни сўрашни бошлади. Мени бошқа безовта қилмасликни сўрадим”, - деди қиз.
Унинг қўшимча қилишича, у воқеани тезда унутган, аммо тунги соат иккиларда бу рақамдан қўнғироқлар яна кела бошлаган.
"Уч марта қўнғироқ қилди, мен гўшакни кўтармадим. Унинг тинчимаслигини билиб, гаплашиб қўришга қарор қилдим. Курьер яна исмимни сўрай бошлади ва “секис” таклиф қилди. Гўшакни қўйишим биланоқ, у қайта чиқди. Шунда унинг барча гапларини видеога ёзиб олдим ва ички ишларга ариза бердим. У қилмиши учун қонун олдида жавоб бериши керак. Кимдир “у ҳали ҳеч нарса қилгани йўқку”, дейиши мумкин. Менимча, у жазога лойиқ ишни қилиб улгурди”, - деди қиз.
Биринчидан, курьер хизмат ваколатларидан чиқиб кетган ва қизнинг рақамини шахсий мақсадларда ишлатган. Иккинчидан, у одобсиз таклифлар билан қўнғироқ қилган. Учинчидан, тунги соат иккидаги қўнғироқлари қизнинг уйқусини бузган ва қўрқитиб юборган.
"Ички ишлар идораси вакиллари 10 кундан кейин мен билан участка инспектори боғланиши ва суриштирув натижалари ҳақида маъумот беришини айтишди. Кимки шундай вазиятга тушиб қолган бўлса, шунчаки ташлаб қўймасликка чақираман. Ўз ҳуқуқимизни ҳимоя қилишимиз ва ўзини қўлга олиб билмайдиган кимсаларни жазолашимиз керак. Кўчада хуштак чалишми, одобсиз қўнғироқларми. смс ёки гап отишми - ҳаммаси учун жавоб бўлиши лозим. Шунда қўли ёки тилига эрк беришга одатланган жиноятчилар бу ишни қилишдан аввал 100 карра ўйлаб кўришади”, - деди у.
