Термиз археология музейида Сурхондарё вилоятидаги археологик ёдгорликларда ўтказилган Ўзбекистон-Хитой қўшма экспедициясининг барча топилмалари биринчи марта тақдим этилган. Тош, керамика ва бронзадан ясалган қуроллар, идишлар, маъбудларнинг ҳайкалчалари ва бошқа буюмлар – мингдан ортиқ ноёб экспонатлар намойиш қилинган.

Тақдимот Термиз ҳудудидаги биринчи археологик экспедициянинг 145 йиллигига бағишланган халқаро илмий давра суҳбати доирасида ўтказилган.

Қўшма археологик экспедиция аъзоларидан бири бўлган хитойлик палеозоолог Дин Юйсинь минг йиллар олдин бу жойларда хонакилаштирилган ноёб экспонатларни – ёввойи ҳайвонларнинг суякларини намойиш этган. Хитой томонидаги экспедициянинг яна бир аъзоси, Хитойда таниқли виртуал музейлар студиясининг етакчи мутахассиси Чжу Цзянсунь топилмаларнинг 3D тасвирларини яратиш лойиҳасини тақдим қилган.

Таъкидлаш лозимки, Ўзбекистон-Хитой қўшма экспедициясининг иши шу йилнинг баҳорида бошланган. Бундан олдин Буюк ипак йўли бўйлаб жойлашган Ўзбекистон ёдгорликларида археологик тадқиқотлар соҳасида ҳамкорлик тўғрисидаги битим имзоланган эди. Унинг ташаббускори Хитойнинг шимоли-ғарбий университети қошидаги Маданий мерос институти бўлган. Келишув Термиз археология музейи ва Термиз давлат университети билан эришилган. Экспедицияга таниқли ўзбекистонлик археологлар ва тарихчилар, уларнинг хитойлик ҳамкасблари, шунингдек, бошқа мамлакатлардан келган бир қатор олимлар киритилган.

Тадқиқотлар Сурхондарёнинг Бандихон туманида жойлашган "Бандихон II" илк темир даври ёдгорлигидан бошланган. 2024 йил баҳорги иш мавсуми биринчи ноёб артефактлар топилганлиги билан ажралиб турган.

"Аввало шуни таъкидлаш керакки, мутахассислар археологик ёдгорликнинг умумий мудофаа деворининг катта қисмини очиб, қайд этишган. Шарқий томонда унинг ички қисмида ажойиб олов маросим ибодатхонаси топилган", - деди Ўзбекистон Маданий мерос агентлиги директорининг биринчи ўринбосари профессор Турсунали Қўзиев.

Шунингдек, олимлар яқин атрофдаги “Ялангтоштепа” археологик ёдгорлиги атрофида дастлабки тадқиқотлар ўтказишган. Бу ерда кўплаб археологик -турли даврлардаги 20 га яқин сопол идишлар, шунингдек, маъбудларнинг терракота ҳайкалчалари ва милоддан аввалги II асрдаги ажойиб сопол идишлар буюмлар топилган.

"Юқоридаги буюмлар орасида "Ялангтоштепа"яқинида топилган ярим одам-ярим фил шаклидаги терракота ҳайкалчаси алоҳида аҳамиятга эга. У юэчжи вакиллари – Хитойдан келган қадимги кўчманчилар томонидан яратилган", - дея таъкидлади Қўзиев.

Халқаро археологик экспедициянинг кузги мавсуми ҳам ноёб топилмаларни тақдим этган. Буларга тош асбоблар, камон ўқларининг бронза учлари ва бой керамика буюмларини киритиш мумкин. Ўтган кун жуда самарали бўлди.

"Кўплаб топилмалар билан бир қаторда, топилган иккита катта сопол хумни алоҳида таъкидлаш керак. Ушбу шаклдаги идишлар Ўзбекистон ҳудудида жуда кам учрайди ва бундай яхши ҳолатда – биринчи марта. Илгари, хитойлик мутахассислар уларнинг милоддан аввалги VI асрга тегишли эканлигини аниқлашган", – деди ўша куни ишларга раҳбарлик қилган Турсунали Қўзиев.

Мутахассислар топилган нарсаларнинг дастлабки хатловини ўтказишган ва уларни Термиз археология музейи фондига топширганлар. Тор соҳа мутахассислари томонидан батафсил ўрганилгандан ва камерал ишловлардан сўнг, ушбу экспонатларнинг аксарияти музей экспозициясида ўз ўрнини эгаллайди, шунингдек, дунёдаги машҳур музейлардаги сайёр кўргазмаларда ҳам намойиш этилиши мумкин.

Шу билан бирга, экспедициянинг иши ҳали тугамаган, куз мавсуми ноябрь ойининг охиригача давом этади.

"Таъкидлаш жоизки, хитойлик мутахассислар нафақат Ўзбекистоннинг тарихий жойларини ўрганишга ёрдам беришмоқда. Шунингдек, улар мамлакатимиз учун янги усул бўйича объектларни консервация қилишмоқда", – дея хулоса қилди Турсунали Қўзиев.