Шу йилнинг кузида сотувга чиқариладиган навбатдаги iPhone'лар беш карра оптик зумга эга перископ камераси билан жиҳозланади. Бу ҳақда iPhone смартфонлари тўғрисида ҳаққоний маълумотларни тарқатувчи Жефф Пу хабар берди.

Унинг сўзларига кўра, Apple ҳозирда iPhone 15 Pro ва 15 Ultra учун перископ линзаларини етказиб берувчи Zhejiang Lante Optics компанияси билан музокаралар олиб бормоқда.

iPhone смартфонларида перископ пайдо бўлиши ҳақидаги миш-мишлар бир неча йиллардан бери тарқалиб келмоқда ва Apple маҳсулотларининг кўплаб мухлислари ушбу янгиликни интиқлик билан кутишмоқда - айниқса перископли биринчи Android смартфонлари бозорда 2021 йилда пайдо бўлганидан бери.

Жефф Пу сўзларига кўра, янги телефото линзалари ёруғликни синдириш учун мураккаб объектив тизимига эга бўлади ва бир хил ўлчамни сақлаб қолган ҳолда, нафақат яхшиланган масштаблаш сифатини, балки 5 карра ва ундан ортиқ катталаштириш қобилиятини ҳам таъминлайди. Агар ҳаммаси режадагидек бўлса, Zhejiang Lante Optics компанияси Apple'га 100 миллионгача линза етказиб беради.

Аввалроқ бир қанча манбалар, жумладан, инсайдер Минг-Чи Куо ҳам янги iPhone'ларда перископ камераси пайдо бўлишини айтган эди.

iPhone 15 линияси тақдимоти 2023 йил сентябр-октябр ойларида бўлиб ўтади.