Кунни бир чашка қаҳва билан бошлашни ёқтирасизми? Иш куни давомида яна бир ёки икки стакан қаҳва кайфиятни кўтарадими? Кечқурун дўстлар билан бир стакан латте устида суҳбатлашишга нима дейсиз? Аммо бу севимли ичимлик инсон саломатлигига қандай таъсир қилади? Фан аллақачон ҳамма нарсани исботлади, деб ёзади «Новий очаг».
Қанча қаҳва ичиш керак?
Бу борада олимлар ҳали бир фикрга келмаган ва турли тадқиқот муаллифлари ҳар хил рақамларни беради — кунига иккитадан олти чашкагача. Кўп жисмоний фаолият билан шуғулланадиганлар ҳам кофеинни етарли миқдорда ичиши мумкин эмас. Бу саломатлик учун жиддий хавф туғдиради.
Қаҳва организмни сувсизлантирадими?
Қаҳва тан олинган ва жуда самарали диуретик (пешоб ҳайдовчи) эканига қарамай, уни мунтазам равишда ичиш жиддий зарар келтирмайди ва организмдаги табиий суюқлик мувозанатини бузмайди. Бундан ташқари, яқинда ўтказилган тадқиқотлар шуни тасдиқладики, кунига икки-уч чашка қаҳва ҳар куни ичиш керак бўладиган икки литр суюқликка тўғри келади.
Қаҳва вазн камайтиришга ёрдам берадими?
Ҳа, агар у шакарсиз, сутсиз, қаймоқсиз ичилса. Нонуштани бир пиёла қаҳва билан якунлаган маъқул – ичимлик таркибидаги кофеин қисқа муддатли метаболизм тезлигини оширади ва натижада олинган калориялар ёғга эмас, балки энергияга айланади.
Қаҳва саратонга олиб келиши мумкинми?
Йўқ, ҳаммаси аксинча, қаҳва таркибидаги антиоксидантлар ҳужайраларни шикастланишдан ҳимоя қилади ва уларни янада чидамли қилади. Америка Саратон тадқиқотлари институти мутахассислари ҳатто қаҳвани саратон хавфини камайтиришга ёрдам берадиган озиқ-овқатлар рўйхатига киритди. Қаҳва истеъмол қилиш тери, кўкрак, простата саратони ва меланома хавфини камайтириш билан боғлиқ.
Қаҳва юрак ва қон томирлар учун хавфлими?
Йўқ, аслида қаҳва томирлар тиқилиб қолишининг олдини олишга ёрдам беради. Қаҳва ҳақиқатан ҳам қон босимининг қисқа муддатли ошишига олиб келиши мумкин бўлса-да, бу таъсир узоқ давом этмайди, шунинг учун ҳам юрак ва қон томирларининг соғлиғига салбий таъсир кўрсатмайди. Шифокорлар қон босими юқори бўлган одамларга қаҳва ичишдан эҳтиёт бўлишни ва ўзини ёмон ҳис қилса, ичмасликни маслаҳат беради, аммо бу ичимликдан бутунлай воз кечиш шарт эмас.
Қаҳва қондаги холестерин даражасини оширадими?
Ҳа, қаҳваларда мавжуд бўлган бирикмалардан бири — кафестол ёмон LDL холестерин даражасини ошириши мумкин. Аммо хавфдан халос бўлишнинг осон йўли бор — уни тайёрлашда қоғоз фильтрдан фойдаланиш тавсия этилади. Агар холестерин миқдори нормал бўлса, ташвишланмасдан доимгидек қаҳва ичиш мумкин.
