Самарқанд вилоятида ноодатий автомобиль ўғирлаш содир бўлган. Жомбой туманидаги маст қиз нафақадаги такси ҳайдовчисининг машинасини олиб қочган. 

"Жомбой туманида яшовчи 71 ёшли фуқаро ички ишлар органларига ариза билан мурожаат қилди. Унинг сўзларига кўра, 4 июль куни эрталаб соат 6:30 да йўловчи сифатида унинг машинасига бир қиз ўтирган ва уни ушбу ҳудуднинг Зарафшон маҳалласида жойлашган ўрмон хўжалигига олиб боришни сўраган", – дея маълум қилмоқда ИИВ.

Йўлда эркак ҳожат учун тўхтаган. Ҳайдовчи машинадан тушиши биланоқ, қиз фурсатдан фойдаланиб, рулга ўтирган ва кейин номаълум томонга кетиб қолган.

Автомобилни қидириш учун барча ЙПХ постларига маълумотлар юборилган. Натижада ўғирланган машина Тайлоқ туманидаги Ғалаботир маҳалласида тўхтатилган.

Йўловчининг шахси аниқланганда, у Жомбой туманидаги Деҳқонобод маҳалласида яшовчи 21 ёшли қиз эканлиги маълум бўлган. Ўша пайтда қиз маст бўлганлиги аниқланган.

Ушбу ҳолат бўйича 267-модданинг 1-қисми (транспорт воситасини ўғирлаш) бўйича жиноий иш қўзғатилган, қиз ҳибсга олинган. Ҳозирда ҳуқуқ-тартибот идоралари ходимлари уни жиноят содир этишга ундаган сабабларни аниқламоқда. Тергов давом этмоқда.

Эслатиб  ўтамизки, бундай жиноятни содир этганлик учун 5 дан 10 йилгача озодликдан маҳрум қилиш жазоси назарда тутилган.