Ўзбекистон президенти Тошкент метрополитенининг хизматлар сифатини ошириш чора-тадбирлари тақдимоти билан танишди. Давлатимиз раҳбарининг сайтидаги ҳисоботда навбатдаги одатий рақамларни ўқиш мумкин. Бироқ ҳисоботда бугунги кунда йўловчилар оқимидан том маънода бўғилиб қолаётган Тошкент метроси қандай ривожланиши кўрсатилмаган. Бироз вақт ўтиши билан, жиддий муаммолар юзага келишидек туюлади.
Президент сайтида "Тошкент метрополитенининг хизматлар сифатини ошириш чора-тадбирлари тақдимоти” билан ўтган учрашув якунлари эълон қилинган. Ҳисоботда узоқ вақтдан бери маълум бўлган статистик маълумотлар яна бир бор такрорланган холос – сўнгги йилларда қўшимча 32 километр линия қурилгани, 21 та янги бекат фойдаланишга топширилгани, 15 та замонавий метро поездлари олиб келингани қайд қилинган. Янги йўналишлар пойтахтнинг Яшнобод, Миробод, Сергели, Янгиҳаёт ва Юнусобод туманлари орқали ўтган, бу эса аҳолининг ҳаракатланишини осонлаштирган. Бугунги кунда метро йўловчилари сони беш баравар кўпайган ва кунлик саёҳатлар сони 720 мингга етган. Поездларнинг авж паллаларда етиб келиш вақти 5-7 дақиқадан 2 дақиқагача қисқартирилган.
Аммо ҳисоботда режалар ҳақида ҳеч қандай сўз йўқ. Метро раҳбарининг телеканалларга берган интервьюсида ҳам режалар ҳақида айтилмаган, гарчи бу масала шаҳар аҳолиси учун энг қизиқларидан бўлса ҳам.
Эслатиб ўтамизки, 2019 йилда пойтахт атрофидаги тўлақонли ҳалқа линияси ҳақида гапирилган эди. Маълум қилинишича, ҳалқа метросининг умумий узунлиги 52,1 километрни ташкил қилади. Лойиҳа беш босқичдан иборат эди. Жами 35 та бекат қурилиши режалаштирилган. "Дўстлик" метро бекатидан "Олмазор" бекатигача бўлган дастлабки икки босқични жорий йилда амалга ошириш кўзда тутилган эди. Учинчи босқичда Олмазор ва Беруний бекатлари ўртасида участка қурилиши режалаштирилганди. Кейинги босқичда линия Беруний ва Бодомзор бекатларини боғлаши керак эди. Охирги босқичда метро "Дўстлик" бекатигача етиб бориши кўзда тутилган эди.
Кейин нимадир нотўғри кетган ва Қуйлиқдан кейин ҳалқа линияси кутилмаганда Сергелига бурилиб, далалар, саноат зоналари ва омборлар бўйлаб ўтган. Тошкент атрофидаги тўлақонли ҳалқа нима бўлди? Лойиҳа архивга топширилганми ёки қайта тиклашнинг иложи борми?
2020 йил сентабрь ойидаги янгиликларда президент " ... энди биз Мирзо-Улуғбек тумани марказидан ТТЗгача метро линиясини қурмоқчимиз", -деб айтган эди. Бироқ, ушбу лойиҳа ҳақида ҳалигача аниқ маълумот йўқ.
2021 йил январь ойида Tashkent Metroproekt лойиҳа институти метрони ривожлантиришнинг бир нечта қизиқарли вариантларини таклиф қилган, унда Юнусобод тармоғини бир томонга Иподромгача, иккинчи томонга Уч Каҳрамонгача узайтириш, Чилонзор тармоғини эса ТТЗгача олиб бориш белгиланган эди. Шунингдек, Иподромдан Қоракамишгача бўлган ҳудудда ҳалқа йўли барпо қилиниши, Қоракамишгача узайтирилган Ўзбекистон линияси билан кесишиши режалаштирилган. Пойтахт амалдорлари бу таклифларни рад этишган ёки ундан ҳам ёмони – эътибор қилишмаганга ўхшайди.
Энди эса Янги Тошкент қурилмоқда ва айни пайтда метрони ривожлантириш режалари "ҳозирги" Тошкентга зарар етказган ҳолда амалга оширилиши мумкин.
Ҳар доимгидек, муаммо мулоқотнинг йўқлигида. Режалаштирилган линияларни асослар ва изоҳлар билан ошкор қилишнинг иложи йўқми? Эҳтимол, гап лойиҳачиларнинг ўзи аниқ позицияга эга эмаслигидадир? Ёки режалар шунчалик тез-тез ўзгариб турадики, уларни оммага эълон қилиш уятлими?
