Американинг «Apple» компанияси янги «iPhone 12»ни тақдим этди. Смартфон 13 октябрь куни Купертинода намойиш этилди.

Кутилганидек, мазкур моделнинг асосий хусусиятларидан бири 5G симсиз тармоқларини қўллаб-қувватлашидир.

Смартфон OLED-дисплейи ва ўта чидамли янги «Ceramic Shield» ойнасига эга. Шунингдек, у олдингиларига қараганда 11 фоизга юпқалашди, 15 фоизга кичрайди ва енгиллашди.

Гаджетнинг дизайни четларининг текислигидан «iPhone 4» ва «iPhone 5», шунингдек, «iPad»га ўхшаб кетади.

Ушбу моделнинг ҳам аввалгиси сингари иккита камераси бор. «Apple» ёруғлик манбаига қарши суратга олиш имконини берадиган янги «Smart HDR 3» функцияси ҳақида маълум қилди. Шунингдек, янгиланган камерада тунги суратга олиш тартиби яхшилангани айтилмоқда.

«iPhone 12» дисплейининг диагонали 6,1 дюймни ташкил этади.

Янги модель бешта рангда сотувга чиқарилади — қора, оқ, қизил, яшил ва кўк.