Мадонна ва Рианна «Forbes» журнали томонидан чоп этилган АҚШнинг энг бой self-made тадбиркорлари йиллик рўйхатига киритилди.
Унда Рианна 33-ўринни эгаллади. У бир йил ичида кийим-кечак ва косметика савдосидан 600 миллион доллар ишлаб топди. COVID-19га қарши кураш учун ташкил этган хайрия жамғармаси эса 22,5 миллион доллар тўплади.
Мадонна 550 миллион билан 40-поғонадан жой олди. Селин Дион 51-ўрин (455 миллион), Бейонсе 55-ўрин (420 миллион), Барбара Стрейзанд 56-ўрин (400 миллион)ни эгаллади.
Рейтингдаги энг ёш аёл — модель Кайли Женнер (23 ёш), энг кекса хоним эса Элис Шварц (94 ёш) бўлиб, у биотехнологиялар билан шуғулланади.
«ABC Supply» асосчиси Диана Хендрикс эса учинчи йилдирки кетма-кет пешқадамликни қўлдан бермай келмоқда. Унинг компанияси том ёпишда ишлатиладиган материалларни ишлаб чиқариш ва сотиш билан шуғулланади.
Рўйхатга киритилган аксар аёллар (100 тадан 45 нафари) Калифорнияда истиқомат қилишади.
