Ўзбекистонда кураш миллий спорт турини ривожлантириш бўйича янги ташаббуслар илгари сурилди. Президентнинг “Кураш миллий спорт турини ривожлантириш ва оммалаштиришни янги босқичга олиб чиқиш чора-тадбирлари тўғрисида”ги қарори (ПҚ-450-сон, 20.12.2024 й.)га кўра, кураш тренерлари ва ҳакамлари халқаро миқёсда фаолият юритиши учун янги механизмлар йўлга қўйилади.
Миллий спортни глобал майдонга олиб чиқиш
Халқаро кураш институти зиммасига бир қатор янги вазифалар юклатилди:
- Халқаро малакали кадрлар тайёрлаш: кураш бўйича тренерлар ва ҳакамларни тайёрлаш, уларнинг малакасини ошириш ва қайта тайёрлаш тизими йўлга қўйилади.
- Илмий-тадқиқот ишлари: кураш бўйича илмий лойиҳалар амалга оширилиб, ўқув-услубий қўлланмалар ишлаб чиқилади.
- Курашни оммалаштириш: спортнинг янги йўналишлари жорий қилиниб, уларни дунёга танитиш бўйича чора-тадбирлар кўрилади.
- Хорижга кадрлар экспорти: кураш тренерлари ва ҳакамлари хорижий давлатларга юборилади, уларнинг фаолияти орқали курашнинг халқаро обрўси оширилади.
Дипломатик ва тадбиркорлик қўллаб-қувватлови
Ўзбекистоннинг хориждаги дипломатик ваколатхоналари курашни халқаро миқёсда тарғиб қилишда муҳим рол ўйнайди. Шунингдек, маҳаллий тадбиркорлар Кураш халқаро ассоциацияси ҳомийлари сифатида жалб қилинади.
Мазкур ташаббуслар курашни умумжаҳон миқёсида тан олинган спорт турига айлантиришга қаратилган.
